साहित्य सदनद्वारा कविता महोत्सवको आयोजना

 

विश्व कविता दिवस (मार्च २१) का सन्दर्भमा साहित्य सदन नेपालबाट आयोजित राष्ट्रव्यापी कविता प्रतियोगितासहितको कविता महोत्सव, २०८१ हिजो चैत्र ८ गते सम्पन्न भएको खबर छ । नेपाल प्रज्ञा प्रतिष्ठानका पूर्वकुलपति कविवर प्राज्ञ बैरागी काइँलाको प्रमुख आतिथ्य, पूर्वकुलपति गङ्गाप्रसाद उप्रेती र साहित्यकार निनु चापागाईँको विशेष आतिथ्य रहेको यस कार्यक्रमको अध्यक्षता साहित्य सदन नेपालका अध्यक्ष प्रा.डा. हेमनाथ पौडेलबाट भएको थियो ।

प्रतियोगितामा नुवाकोटकी एलिसा एकलास प्रथम, भक्तपुरका भीष्मराज काफ्ले द्वितीय र पर्वतका तारानाथ पराजुली, उदयपुरका जीवन आरोही तथा मोरङका सोमनाथ दाहाल तृतीय घोषित भए । प्रथम हुनेलाई तीस हजार, द्वितीय हुनेलाई बीस हजार र तृतीय हुनेलाई जनही दस हजार पुरस्कार र प्रमाणपत्र प्रदान गरियो । मूल्याङ्कन समितिको कार्य गोविन्द घिमिरे वेदमणि र नर्मदेश्वरी सत्यालबाट भएको जानकारी समारोहमा दिइएको थियो ।

कार्यक्रममा ५ जना पुरस्कृतसहित २२ जना अतिथि कविहरूले कविता प्रस्तुत गरेका थिए । अतिथि कविहरूमा सविता बराल, मातृका पोखरेल, राजेन्द्रप्रसाद अधिकारी, बलराम तिमल्सिना, ईश्वरचन्द्र ज्ञवाली, भुवनहरि सिग्देल, कल्पना भट्टराई, डिल्लीप्रसाद 'मूलतिहुन', अमर गिरी, भैरवी भूगोल, रेजिना आपगाईँ, बाजुराम पौडेल, अर्जुन पराजुली, विन्दु शर्मा, प्रज्ज्वल अधिकारी, रजनी ढकाल, हीरामणि दुःखी, जगदीशचन्द्र भाण्डारी, गौरी देवकोटा, लक्ष्मण गाम्नागे, रामचन्द्र दाहाल, निर्मलरमण पराजुली थिए ।

मूल्याङ्कन समितिका संयोजक गोविन्द घिमिरे 'वेदमणि' र सदस्य नर्मदेश्वरी सत्याल, सदनका सचिव प्रह्लाद पोख्रेल, उपाध्यक्ष मित्रलाल पंज्ञानी र अध्यक्ष हेमनाथ पौडेलले मन्तव्यसहित कविता वाचन गरेका थिए ।

000

शब्दपथ  बाट