“श्यामप्रसादको निधनबाट साहित्यमा अपुरणीय क्षति”

काठमाडौँ, २१ जेठ २०७४ ।

बरिष्ठ साहित्यकार श्यामप्रसाद शर्माको निधनबाट साहित्यिक क्षेत्रले अपुरणीय क्षति व्यहोरोको बताइएको छ । शर्माको स्मृतिमा प्रगतिशील लेखक सङ्घले शनिबार आयोजना गरेका श्रद्धाञ्जलि कार्यक्रममा उहाँको सरल जीवन र जनपक्षीय विचारबाट नयाँ पुस्ताले प्रेरणा लिनुपर्नेमा पनि वक्ताहरुले जोड दिनुभयो । 

सङ्घका संस्थापक अध्यक्ष एवं नेपाल प्रज्ञा प्रतिष्ठानका आजीवन सदस्य समेत रहनुभएका साहित्यकार शर्माले राजनीति, साहित्य, पत्रकारिता र समाजसेवाका विविध आयाममा छ दसकभन्दा बढी समय अनवरत योगदान दिनुभएको थियो । 

विसं. १९८६ असार ६ मा जन्मनुभएका शर्माको गत वैशाख २४ गते ८७ वर्षको उमेरमा काठमाडौँमा निधन भएको थियो । उहाँका पाँच दर्जनबढी पुस्तक प्रकाशित छन् । 

सङ्घका पूर्व अध्यक्ष एवं चिन्तक निनु चापागाईँले शर्मा होचो कदको अग्लो मान्छे भएको चर्चा गर्दै विरोधीसँग पनि मिलेर गर्न सक्ने क्षमतायुक्त हुनुभएको बताउनुभयो । नेपाल प्रज्ञा प्रतिष्ठानका सदस्य सचिव डा जीवेन्द्रदेव गिरीले शर्मा जनपक्षीय विचारका प्रणेता भएको जनाउँदै प्रगतिशील साहित्यिक क्षेत्रको धरोहरको निधनबाट अपुरणीय क्षति भएको बताउनुभयो । 

शर्माका छोरी सम्झना शर्माले उहाँका बाँकी पाण्डुलिपीको प्रकाशनमा सबैको सहयोगको अपेक्षा व्यक्त गर्नुभयो । 

कार्यक्रममा सङ्घका अध्यक्ष मातृका पोखरेल, महासचिव आरएम डङ्गोल, साहित्यकारहरु शान्तादास मानन्धर, हरिहर खनाल, राम विनय, वासुदेव अधिकारी,मित्रलाल पङ्ज्ञेनी, डा विन्दू शर्मालगाउतले श्यामप्रसादको व्यक्तित्व र कृतित्वबारे चर्चा गर्नुभएको थियो ।

रासस बाट