कविता : प्रश्नहरूको बाढी

 - मातृका पोखरेल

भूमिगत अक्षरहरू लेखिएको

रोल्पामा भेटिएको डायरी कसको हो ?

कसको हो ?

निबबाट बग्दै गरेको आलो मसीसहितको

रुकुममा भेटिएको रातो कलम ।

कसले छाडेर गएछ राजधानी ?

सपनाहरू थुनिएको पुरानो ट्याङ्का सिन्धुलीको गाउँमा ।

गरिबी पसिनाले धोएको सुट लगाएर

राजनीति गर्नु जोगी हुनलाई होइन भन्दै

जनअदालतको इजलासमा

भर्खरै मात्र कसले गरिरहेछ बहस ?

सगरमाथा चढ्ने कुरा गर्दै

कसले तापिरहेछ चौरमा घाम ?

पहेँलो बस्त्र ओढेर मण्डपमा

कसले कोट्याइरहेछ सिन्काले दाँत ?

प्रश्नहरू बग्रेल्ती छन् सडकमा

प्रश्नहरू बाढी बनेर आउने हल्ला आइरहेको छ,

प्रश्नहरूको बाढी पसेपछि

के होला हाम्रो बस्तीमा ?

हाम्रो सहरमा ?

कौतुहलताका आँखाहरू फालेर

म प्रश्नहरूको बाढी पर्खिरहेको छु ।

मान्छेहरूले भन्न छाडेका छैनन्

प्रश्नहरूको बाढी

पानीको बाढीभन्दा शक्तिशाली हुन्छ ।



फित्कौली  डट कम
------------------------------

फेसबुक वालबाट