कविता : सर्त

- मातृका पोखरेल 

म तयार छु - 

उनीहरुको पछि लाग्न

तर उनीहरुसँग आँखा हुनुपर्छ

म साँच्चै तयार छु

उनीहरुको पछि लाग्न

तर उनीहरुसँग

शिखर चढ्न तयार

सबल खुट्टा हुनुपर्छ

म वर्षौंदेखि खोजिरहेछु

अघि हिँड्ने मानिसहरुका

झर्झराउँदा आँखाहरु

र, सबल खुट्टाहरु ।

हो मैले नमानेकै हो–

अन्धाहरुको पछि लाग्न

र, मैले नमानेकै हो

लङ्गडाहरुलाई दौडमा छनोट गर्न

धेरै पटक जनाएको छु असहमति

र, फेरि लेखेको छु यो कविता ।

म तयार छु–

उनीहरुको पछि लाग्न

तर मैले खोजेकै हो

उनीहरुसँग

सुदूर यात्राको सङ्कल्प ।

■

अक्षलोक, पूर्णाङ्क २५, २०६१ वैशाख

======================================